Vakansie-tyd

Vakansie is soos toor.  Daggie weg van normale roetines en my menswees kom uit.  Ek word die lag mens.  Die mens wat weer lekker kry deur net te wees en te beleef.   Wat tyd het om te luister sonder om te wonder watter mails en boodskappe wag om geaksie te word.

Vakansie tyd kan ook nogal kla tyd wees.  Met die witbrood onder die arm hou ons daarvan om te kla.  Ek wens ek kan ou klakous in my siel verlê, skei of vermoor dalk!  Klakous het die vermoë om iets wat ongelooflik is te verminder na gemiddeld. 

Die prentjies van wat ek gesien het spin in my kop.  Dit is tyd om weer ‘n onthou foto versameling bymekaar te sit sodat ek die plekke kan besoek deur prentjies vasgevang.

Die wens vir myself is dat ek die vakansie mens in my dag tot dag lewe kan wees.  Dat my luister nie net hoor is nie maar verstaan luister.  Dat my tyd nie net in die hardloop vir iemand gegee word nie maar werklik geallokeer word.  Dat my reaksie op enige aksies berekend sal wees. 

Wens ek ken die resep sodat ek dit aan almal kan uitdeel.   Ons as gemeenskap sal dan soveel meer kan vermag!