Onderswysers se opinie en diagnoses

Onderswysers se opinie en diagnoses

Graad R het ons by ‘n  juffrou geland wat sterk opinies het asook sterk diagnoses gemaak het.  My kind se punte was nooit meer as 3 uit 7 nie.  Die rede vir dit was as ons tot ons sinne kom en ons hom terug hou dan is dit ‘n makliker gesprek met die department van onderwys.

Ons is meer as twee keer ingeroep om ons te oortuig dat hy moet agterbly.  Op ‘n geleentheid het die juffrou haar diagnose van ons kind vir ons gegee.  Hy sal glo standard 8 agter die fietslootse dagga rook omdat hy nie gaan ‘cope’ in die skool nie.  My humeur het tot in rooi gegaan daai dag.  My antwoord was dat dit onmoontlik is want daar is nie meer ‘n standard 8 nie – dit is graad 10, daar is nie meer fietslootse nie , kinders van vandag word afgelaai of gaan met motorfietse skool toe en ons sal darem beter drugs as dagga kan bekostig.  Dit was nie ‘n goeie vergadering nie…
​
Ek het so gedruk gevoel dat ons baie geld gespandeer het op asseserings en baie hard gebid het vir antwoorde.  So besluit die mamma dat haar seun maar Graad R moet oordoen. Bel die skool en bevestig dat hy weer Graad R gaan doen.  Baie opgewonde vertel die dame my dat dit ‘n baie goeie besluit is en dat my seun weer terug is by dieselfde juffrou.  Op daardie oomblik weet ek dat my gebed beantwoord is en die besluit sommer maklik gemaak het.. ons gaan aanskuif.. ons gaan graad 1 toe.  Daar is nie ‘n manier wat ek weer by die juffrou in die klas wil wees nie.
​
Vandag is my seun graad 4, sy gemiddeld is oor die 90%, hy geniet die skool, baie maats en geniet sy sport baie.  Sy onderwysers sover was net opbouend en lief vir my kind.  Het hom ondersteun en hom gehelp.  Diep dankbaar dat ons die regte besluit gemaak het.