Leë bladsy

Wat is my plan dat 2022 nie net verby spoed nie!  Ek wil leef, werklik leef.  Dankbaarheid en seën beleef.  My grense, oeroud, moet verrot dat ek nuwe ongetemde areas ontdek.   Missie is om nie te verval in net nog ‘n roetine nie.  Te fokus sodat elke minuut tel, al is dit om te lê en droom oor nog ‘n avontuur.  Elke droom moet aksies insluit om dit ‘n werklikheid te maak.

Die begin wanneer alles nog besig is om te ontvou, maak tyd om jou administrasie af te handel.  Planne te vorm oor elke asem, minuut.  Moenie jouself kastei oor mislukkings nie, probeer net weer.  Ek het laasjaar oor die orosmannetjie geskryf, dink ek wou hom afskud, maar hy klou maar nogsteeds aan my.   Ek hoor konstant by maer mense hulle wil tog nie vet wees nie. Pla dit my, ja, wys ek dit, nee.  Gaan ek die jaar weer probeer, seker.  Het ek al begin probeer, ja, het ek misluk, ja, gaan ek weer probeer, seker.

Die belangriskste fokus is om seker te maak jy gun ander mense hulle lekker, hulle sukses.  Hou op verskonings maak omdat jy nie so mooi, maer, selfde geleenthede gekry het nie of nie so slim is nie.  Elke ou het ‘n seer, ‘n skaam, ‘n martelstok om te gebruik as verskoning.  Onthou sukses is wat jy vir jouself gestel het.  Nie wat ander vir jou wil stel nie.  Ek gaan nou nie my missie maak om die ryskste vrou in Suid-Afrika te word nie, maar ek gaan wel begin spaar en geleenthede soek wat sal toelaat dat ek kan dinge doen wat ek van hou.
​
Hou jou beker vol sodat jy maklik vir ander kan skep uit jou beker.  Hou jou hart oop sodat jy die lekker van liefde beleef.  Hou jou tyd dop dat jy nie mors met die kosbare skat nie.