Ek lees van die positiewe frases wat mense so graag op hul status sit en ek wonder soms wie is die mens teen wie die boodskappie gemik is?  My gunsteling: Bly weg van mense wat negatief is.. soms dink ek die persoon moet dan wegbly van homself.. maar mens sien mos die foute in ander makliker raak.  

Persoonlikheids tipes kom op in my gedagtes. Die definisie verskil van boek tot boek. Ons self diagnoseer nogal baie.   As ek myself kyk.. ek hou nie van mense nie…. Maar dit maak nie van my ‘n introvert nie.. ek dink net my persoonlikheid is afferig.  As jy nie moeite doen om my te leer ken nie gaan jy dink ek is kwaai, vooroordeeld of sommer net blatant misluk  Ek klim gou op ‘n perd en dan is ek moeilik om te vang.  Ek raak gefrustreerd met mense wat nie op my bladsy wil wees nie.. soveel dinge.. dalk is ek daai negatiewe persoon.  My frustrasie steek kop uit by mense vir wie ek omgee… as ek nie daarvan ontslae geraak het voor ek hulle sien nie.

Ek voel deesdae afgestomp vir mense en hulle probleme.  Ek sukkel om in te pas in die groepies en sosiale kringe.  Jip beslis persoonlikheidsprobleme. Ek probeer nie meer nie… en dit wys as ek sien hoe min mense eintlik omgee.  As ek nie eerste hallo sê nie hoor ek nie van die persoon nie.   Hoe maak mens mens se fondasie dan anders dat ek meer gemoedkomend kan wees, dalk meer omgee.

Totsiens is te finaal…eintlik moet mens net sê stywe lyne...  Ons maak dan seker ons seën die persoon dat dit goed sal gaan tot ons mekaar weer sien.

As ek nie soos jy is nie… of as ek nie soos jy dink nie maak dit van my ‘n slegter mens?  Hoeveel keer het jy al iemand geoordeel of is jy geoordeel?

Hoe eg  is jou glimlag en gelukwensing as jy ‘n trotse ouer se boodskappie sien, of as jy sien dit gaan goed met ‘n persoon.. Wat maak my hart swart en  my tong vol gif?  Ek self het al met ‘n glimlag iemand geluk gewens maar my hart het geskree dat dit onverdiend is..

Die lewe is vol wense..  ek wens ek is mooi, ek wens ek is maer, ek wens ek is ryk, ek wens ek was slim.. ek wens ek was soos sy.. maar weet jy hoe sy is?   Wil jy regtig soos sy wees?

Sien die giftige tong nogal baie by jongmense… die hartseer is dat sommige tonge onder die mantel van Christenskap bedek word.   Ek wonder soms hoekom daar ‘klasse’ is in die mense wat in God glo.  Voel so of ons die pot mis sit.  Ek dink ek is ‘n beter Christen as jy.. ek doen nie wat jy doen nie.. Dit maak my twyfel of ek as Christen geklassifiseer wil word.
​
Ek is vandag geirriteerd.. hartseer en moeg.. sommer als in een… jy wat verby my stap en my nie groet nie, maak of jy my nie sien nie.. jy wat my oordeel omdat ek dalk ‘n kras woord spreek of my kinders nie grootmaak soos wat jy joune groot maak nie, dat ek nie elke sondag in die kerk sit nie .. wel… ek kyk ook nou weg.. totsiens!