Wees gelukkig want om gelukkig te wees is om te wees..

Wat beteken dit om te wees?  Dit klink so algemeen.  Wêreld geluk word gemeet aan die kar wat jy ry, die huis waarin jy bly, jou geld, jou status.. hoeveel vriende jy het.  Is die definisie dan my definisie van wees van gelukkig wees?

Laat my dink hoe begeesterd ek altyd was na ‘n kerk kamp.  Ek kon berge versit.  Die gevoel hou net ‘n paar weke want ‘wees’ neem oor.  My definise van wees kom van geslagte se wees.  Ons het gesien wat ons ouers en grootouers doen en in ons menswees en bestaan neem ons dit aan as die maatstaf van gelukkig wees.  Ons is geleer om skool klaar te maak, om te gaan leer, om te trou en kinders te hê, om uit te sien na aftrede en dan dood te gaan…

Hoe breek mens die resep sodat jou wees in gelukkig wees ‘n werklike diepgronde lekker wees is.  Ek loop in sirkels vandag.. my loop vir wees kom terug na die ou bekende wees… gelukkig getroud, mooi en slim kinders..   en ja dit maak mens gelukkig as mens… maar dan vergeet mens weer die vraag van wat  is jou doel hier op die mooi moeder aarde..

Dit is tyd om weer dieper te delf… ek gaan aanhou krap totdat mens die wortels kan voel van my gelukkig wees.. sodat mens dit geanker kan hou al gaan dit swaar.

My rooikop kort ‘n salon besoek.  My hare groei nou uit onder die rooi.. maar waar dit gewoonlik vaal deurslaan sien ek nou net grys.  Ek kan ook nie die grys hare uit trek nie.. want dan gaan ek kaalkop wees.

Het jy geweet as dit koud is en jy oefen hard dat die sweet op jou kaalkop uitslaan – dan stoom jou kop.. ware verhaal.. baie bly ek het hare..

Wag my gedagtes dwaal vandag. 

Ek wonder wie het my nou grys gemaak.  Maar elke keer is dit maar net ekself.  My kwaai en my raas, my frustrasies slaan nou deur in my hare.  Die nader aan 50 maak dit ook makliker om te verduidelik.  My siel is jonk, maar my jare grens aan oud.

Ek sit gisteraand een kant en neem die poppe waar.  Ons gaan nou vir 45 minute ly.  Die oefen man met sy spiere dink mos ek is 20.   Die jong meisies kom in met hulle mooi oefen klere, vars gegrimeer.   Giggel en chattend.  Ek sit in die hoek.. gesiggie gewas.. hare agter oor ingedruk en wonder of ek nog kan ontsnap.  Na die 45 minute bly ek lê!  Ek wonder nog steeds of ek nie net moet ophou lekkers en chips eet nie.. dan sal ek gewig verloor.. 

Ek voel vandag soos ‘n dominee wat ‘n uur moet praat maar nie by ‘n punt kan kom nie.  My hare is grys en dankie tog vir my haarkapper.  My gesig vol plooie maar dankie tog vir die lag en die seer wat dit veroorsaak het.  My persoonlikheid nie altyd vriendelik nie .. dankie tog vir my vriende wat my ken en vir my lief is.  My lyf is styf en ek hou van eet.. dankie tog dat my man nog van my hou. 

Dink die ding waaroor ek die dankbaarste is is dat ek niemand meer hoef te beindruk nie.